ភ្នំពេញ៖ នាយករដ្ឋមន្ត្រីកម្ពុជា សម្តេចតេជោ ហ៊ុន សែន កត់សម្គាល់ថា ក្រុមហ៊ុនផ្ដល់សេវាកម្មអ៊ីនធឺណិតមួយឈ្មោះថា ហ៊ូមអ៊ីនធឺណិត គឺជាក្រុមហ៊ុនដែលផ្តល់សេវាអ៊ីនធឺណិតខ្សោយជាងគេនៅកម្ពុជា និងបានបញ្ជាឱ្យក្រសួងប្រៃសណីយ៍ និងទូរគមនាគមន៍ ចុះត្រួតពិនិត្យលើក្រុមហ៊ុនអ៊ីនធឺណិតមួយនេះផងដែរ។

សម្តេចតេជោបានថ្លែងនៅក្នុងពិធីសម្ពោធទីតាំងថ្មី នៃសាកលវិទ្យាល័យភូមិន្ទវិចិត្រសិល្បៈ នាព្រឹកថ្ងៃទី២៤ ខែឧសភា ឆ្នាំ២០២៣ថា៖ «ក្រុមហ៊ុន (អ៊ីនធឺណិត) ដែលអន់ជាងគេនៅស្រុកខ្មែរ គឺក្រុមហ៊ុនហ៊ូមអ៊ីនធឺណិត អាហ្នឹងម៉ែអន់ ឪអន់ហើយ។ ឥឡូវក្រសួងប្រៃសណីយ៍ ចុះមើលក្រុមហ៊ុននេះតិចមើល។ […] បុគ្គលិករបស់អ្នកឯងឬកធំជាងនាយករដ្ឋមន្ត្រី ពីព្រោះនាយករដ្ឋមន្ត្រីមិនដែលធ្វើឬកធំផងហ្នឹង»។

សម្តេចតេជោបានណែនាំឱ្យក្រុមហ៊ុនអ៊ីនធឺណិតនានាដំឡើងអង់តែនឱ្យបានច្រើនតាមតែអាចធ្វើទៅបានដើម្បីផ្តល់ភាពងាយស្រួលរហ័សទាន់ចិត្តដល់អ្នកប្រើប្រាស់៕